Vizit kartı üçün hansı kağız seçilməlidir?

Vizit kartı çox vaxt müştərinin əlinə keçən ilk brend materialıdır. Dizayn nə qədər gözəl olsa da, nazik, asan əyilən və ya ucuz görünən kağız ilk təəssüratı korlayır. Bu yazıda vizit kartı üçün kağız seçərkən nələrə diqqət etmək lazım olduğunu sadə dildə izah edirik.

1. Qalınlıq və qramaj

Vizit kartı üçün tövsiyə olunan qramaj 300–350 q/m²-dir. 250 q/m²-dən nazik kağız əldə asanlıqla əyilir və etibarsız görünür. Premium kartlar üçün 400 q/m² və daha qalın karton, yaxud iki vərəqin bir-birinə yapışdırılması (dublyaj) istifadə olunur.

• 300 q/m² – gündəlik istifadə üçün optimal seçim
• 350 q/m² – daha bərk, keyfiyyətli hiss
• 400 q/m² və yuxarı – premium, yaddaqalan kartlar

2. Səth növü

Mat

Parıltı vermir, mətn rahat oxunur, üzərinə qələmlə qeyd yazmaq olur. Sakit və ciddi üslub üçün uyğundur.

Parlaq (qlyans)

Rənglər daha canlı görünür, fotoşəkilli dizaynlarda effektlidir. Lakin işıqda əks etdirir və üzərinə yazmaq çətindir.

Teksturlu dizayn kağızları

Kətan, dəri, keçə (felt), sədəf (perlamutr) və metallik səthli kağızlar karta toxunuş hissi qatır. Belə kartı insan əlində daha uzun saxlayır, barmaqları ilə hiss edir – bu da brendin yadda qalmasına kömək edir.

3. Kağızın rəngi

Hər kart ağ olmalı deyil. Qara, tünd göy, qırmızı və ya kraft kağız üzərində folqa ilə vurulmuş loqo çox təsirli görünür. Rəngli kağızda ağ və ya açıq rəngli çap planlaşdırırsınızsa, bunu əvvəlcədən mətbəə ilə dəqiqləşdirin.

4. Bitirmə əməliyyatları

• Laminasiya – kartı nəmdən və sürtünmədən qoruyur; soft-touch laminasiya məxmər hissi verir.
• Folqa (isti tisnə) – qızılı, gümüşü və ya rəngli parıltılı detallar.
• Konqrev (qabartma) – loqo və yazıların relyefli görünməsi.
• Dairəvi künclər – müasir və yumşaq görünüş.

5. Çap üsuluna uyğunluq

Kağız seçilmiş çap üsuluna uyğun olmalıdır. Rəqəmsal çap maşınları müəyyən qramaj və səth növlərini qəbul edir, bəzi teksturlu və tünd kağızlar isə ən yaxşı nəticəni ofset, ipək çap və ya folqa ilə verir. Kağızı almadan əvvəl mətbəədən hansı kağızlarla işlədiyini soruşun.

Qısa xülasə

• Standart kart üçün 300–350 q/m²
• Oxunaqlılıq və yazmaq üçün mat səth
• Fərqlənmək üçün teksturlu və rəngli dizayn kağızları
• Laminasiya və folqa ilə əlavə dəyər

Printshop-da dizayn kağızları, karton, laminasiya plyonkası, folqa və cildləmə materialları mövcuddur. Ətraflı məlumat və qiymətlər üçün zəng edin və ya WhatsApp-a yazın: 050 890 11 44. Ünvan: A.Salamzadə küçəsi, Bakı.