Kağızın lif istiqaməti nədir və niyə vacibdir?

Kağız istehsalı zamanı sellüloz lifləri kağız maşınının hərəkət istiqamətində düzülür. Bu, kağızın lif istiqaməti adlanır. Gözlə görünməsə də, lif istiqaməti çap, qatlama və cildləmə zamanı nəticəyə birbaşa təsir edir.

Uzun lif və qısa lif

Liflər vərəqin uzun tərəfinə paralel düzülübsə – uzun lifli (long grain), qısa tərəfinə paralel düzülübsə – qısa lifli (short grain) kağız adlanır. Kataloqlarda bu adətən ölçünün yanında göstərilir: məsələn, 70×100 sm (LG), yaxud lif istiqamətinə paralel olan ölçünün altından xətt çəkilir.

Lif istiqamətini necə yoxlamaq olar?

• Əyilmə testi – vərəqi hər iki istiqamətdə yüngülcə əyin. Lif boyunca daha asan əyilir.
• Cırma testi – lif boyunca cırılan kağız düz, lifə qarşı isə əyri-üyrü cırılır.
• Nəmləmə testi – kiçik kağız parçasının bir tərəfini isladın; kağız lif istiqamətinə paralel ox ətrafında qıvrılır.
• Dırnaq testi – vərəqin kənarını iki dırnaq arasından çəkin; lifə qarşı olan kənar daha çox dalğalanır.

Niyə vacibdir?

Qatlama

Lif boyunca qatlanan kağız hamar və təmiz qat verir. Lifə qarşı qatlandıqda, xüsusən qalın və dolğun çap olunmuş kağızda, qat xətti boyunca çatlar yaranır və boya qopur.

Kitab və bloknotlar

Cildləmədə liflər kitabın belinə (tikiş xəttinə) paralel olmalıdır. Əks halda səhifələr çətin açılır, dalğalanır və kitab öz-özünə bağlanmağa meyl edir.

Nəm və ölçü dəyişməsi

Kağız nəmi udduqda lifə perpendikulyar istiqamətdə daha çox genişlənir. Bu, ofset çapda rənglərin üst-üstə düşməməsinə, qutuların və üzlüklərin əyilməsinə səbəb ola bilər.

Qablaşdırma və qutular

Qutunun bərkliyi də lif istiqamətindən asılıdır. Düzgün yönəldilmiş karton qutunun divarlarını daha möhkəm edir.

Praktik məsləhətlər

• Kağız sifariş edərkən lif istiqamətini mütləq soruşun.
• Vərəqi kəsərkən hissələri elə yerləşdirin ki, qat xətti lif boyunca olsun.
• Lifə qarşı qatlamaq məcburiyyətindəsinizsə, əvvəlcə biqovka edin.
• Kağızı çapdan əvvəl bir neçə saat çap otağında saxlayın ki, temperatur və nəmliyə uyğunlaşsın.

Printshop-da dizayn kağızları, karton, laminasiya plyonkası, folqa və cildləmə materialları mövcuddur. Ətraflı məlumat və qiymətlər üçün zəng edin və ya WhatsApp-a yazın: 050 890 11 44. Ünvan: A.Salamzadə küçəsi, Bakı.